أنا فيلسوف
وعينيكي شوك الأسئلة
عاملالي حتة مشكلة
نظرت يمكن التقي في الكون جواب
ما لقيتش غير حبة سحاب
متنتورين
أما اللى ثابت ف الفضا
وع الأرض
وف طعم السنيين
سكة حنيين
خطوة جنون متبرجلة
وتأملات الفلسفة متأجلة
***
أنا فيلسوف
وانتي ارتباكة عقل
أو عمق ارتباكه
لا انتي شيطان
ولا ملاكه
ولا أي شيء واضح
يدل على الثبات
فكرت أبات فيكي
لقيت صدرك حجر
فكرت أهجر نظرتك
فلمحت فوق غصنك حنان
رمان بيوعد بالأمان
وفواكه الكون كلها
بتهز فيا الاتزان
وكل لفتة بمعجزة
وكل لمسة امتحان
يا ميت ندامة يا فلسفة
شفايفها محتاجه الدفا
وشفايفي لسه بتعتزر
عن الزيارة الخاطفة
عقلي اللي بيخاف م الشطط
هدد ف قلبي العاصفة
أنا فيلسوف وانتي الحياة
محتاج إلى طوق النجاة
طاوعي الجناح
واديني أحضانك فضا
أو مصيدة
***
أنا فيلسوف
واحب أوصل للحقيقة مجردة
أحب أوصل للحقيقة العارية
فكي الضفاير
والزراير
والسدود
فكي الحدود
وحركي فيا الرعود
اروي اشتياقك بالمطر
وادوقك طعم الخلود
***
أنا فيلسوف
وكرهت طعم الفلسفة
وباحب نور الموجودات
وبحب إيه تاني
البنات
والصبايا والبنات
ما ترسينيش يا رب على بر الحقيقة
وكفاية طعم الغمازات
شهد وعجب
وديم عليا الانفلات
وبلاش تعب
شوفتي الجنان
انتي السبب
فجرتي فيا رغم عقل الفلسفة
أدب على قلة أدب
شكرا لمرورك الكريم