شعر العامية المصرى

بيقولوا ليه ان البنات م الزهرة جات؟
وان الولاد جات من زحل؟!
طاب احنا ليه نفس الحاجات بنحبها ؟
نفس الكمنجة ولحنها !
نفس الكلام بنردده !
حتى المعانى ومقصده !
وصوتنا له نفس النغم !
نفس الملامح والشبه !
مع انك انتى احلى منى بالف مرة
والطيبه واحدة فى قلبنا مع انها دلوقتى مرة
والكلمة ازاى تخطفيها من لسانى وتقوليها
واى حاجة احس بيها تحسى قبلى من سنه
بنكون ساعات نفس الجنان والعقل واحد مشترك
وقبلت ادخل فى الشبك لما جوايا اتشبك
ميكونش اصلا اصلنا تفاحة واحدة اتقسمت
وصعب انها تكتمل غير فى لحظات اللقا
اشمعنى انتى م البنات
شمسى بتشرق من عنيكى الطيبه
والعمر بيكى يبدتى
لما بشوفك برتوى
يختفى فى حلقى المرار
انتى البداية للنهار
انتى القمر وانا ارض ليكى بتحتويكى
فتنوريها وتحضنك
مشايفش ايدك مشنقة
ملمسها انعم م الحرير
لما المسك
جسمنا بيصبح نغم
اشمعنى انتى اللى قلبى قال لها مليون نعم
ومخايفش ليه وانا بقترب
مش مضطرب
ولا حتى حاسس بارتباك
خجلى اختفى
والكلام وياك دايما يتولد من غير سبب
كأن الحياة شباك كبير
واحنا ليها الضرفتين
وللشط احنا الدفتين
احنا الحقيقة فى اكتمالها وحسنها
وكأننا واحد صحيح لكنه فى اتنين اتقسم
حتى اسمنا حروف موازيه بعضها
وفيكى وحدك كل حاجة بحبها
ايه الحكايا
هو انت ياك مش م البنات
ولا انا مش من زحل

احمد ابن فخرى الاسوانى